Dhowr qarax ayaa caawa fiidnimadii laga maqlay bartamaha magaalada Baydhabo ee gobolka Bay kuwaasoo khasaare nafeed geystay sida ay sheegayaan warar goor dhow naga soo gaaray magaaladaas.
Qaraxyada oo loo adeegsaday bambooyinka gacanta laga tuuro ayaa ayey wararku sheegayaan in lagu weeraray hoyga uu magaalada Baydhabo ka degan yahay Xildhibaan Carfo Ibraahim Aadan oo ka tirsan Baarlamanka Koonfur Galbeed Soomaaliya, marna soo noqday Guddoomiyaha Guddiga doorashooyinka Koonfur Galbeed ee markii dambe is casilay.
Goob joogayaal ayaa sheegaya in kooxda bambooyinka tuuray ay ku baxsadeen gaari yar oo ay wateen.
Xildhibaanka la weeraray oo xiligaas ku sugnaa hoygiisa ayaa ka badbaaday bambooyinka gurigiisa lagu tuuray balse waxaa ku dhaawacmay labo ruux oo kala ahaa askari ka tirsanaa ilaaladiisa iyo haweeney mareysay agagaarka guriga la weeraray.
Ciidamada amaanka Maamulka Koonfur galbeed ayaa gaaray goobtaas, iyagoo halkaas ka wada howlgalo baaritaano ah, mana jiro illaa hadda wax war ah oo ay qaraxyadan ka soo saareen.
Xafiiska Shabakada Allbanaadir.com
Muqdisho Somalia
Allbanaadir@live.com
